Молитва святому праведному Василию Павлово-Посадскому


О пречудный угодниче Христов Василие! Заповеди Господни возлюбив, иго Христово благое на рамена прием, в мире равноангельски пожил еси, и дары благодати, яже, в невидимых миру подвизех потрудився, от Бога прият, щедре всем требующим подавал еси. О Церкви Божией ревновавый, ты многия овцы заблуждшия, взыскав, к Единому Пастыреначальнику привел еси. И тако ненавистен бе слугам диаволим, якоже и по прествлении твоем, по мнозех летех судилище сотворивше, злобне тебе поношаху. Погибе память их, тебе же прослави Господь, и ныне, в сиянии Славы Божия Престолу Его предстоя, моли Пресвятую Троицу, яко стяжавый дерзновение, о нас, к раце мощей твоих припадающих и чтущих любовию честную память твою, да сохранит Господь державу нашу Российскую в мире глубоце, да утвердит в ней веру Православную., Церковь Русскую да соблюдет от расколов и ересей неколебиму, да дарует нам покаяние и спасет души наша. Аминь.


Тропарь, глас 4-й
Божественною Свыше просветився благодатию, образ жития евангельскаго, правыя веры ревнитель и расколов обличитель показался еси в Посаде Павловстем, Василие праведне, верных наставниче и предстателю. Темже не оскуде даже до днесь честная память твоя. Моли Человеколюбца Бога оставление грехов молитвами твоими нам даровати.


Кондак, глас 2-й
Соблазны лукаваго века сего отверг, слезами покаяния убеливый ризы твоя, приял еси от Бога многая дарования: недужных исцеляя, совет благоразумен требующим подавая; и ныне радуешися со ангелы, венцем небесным увенчанный. Моли Господа, угодниче Христов Василие, да дарует и нам покаяние и велию милость.


Память 1 марта/16 февраля и 7 августа/25 июля.

07.01.2005

    Спасибо за то, что существуют такие православные сайты, как ваш. Пришлите мне, пожалуйста, если возможно, акфист мученику Роману Сладкопевцу.
    Мой адрес: zion20@tut.by

Комментарии запрещены.

Использование материалов сайта возможно только с письменного разрешения редакции.
По вопросам публикации своих материалов, сотрудничества и рекламы пишите по адресу blago@cofe.ru